Komeleya Mezluman:“Divê pirsgirêka kurd û hêzên çekdar wekhev neyê nirxandin”,21 Tîrmeh,2006 | Kurdistan

Amed / Nevzat Karakeçî

Serokê Giştî yê Komeleya Mezluman Ayhan Bilgen, ji ber peyamên xwe yên di derbarê pirsgirêka kurdî de, ji aliyê hêzên tarî yên dewleta tirk ku navê ‘Tugayên Tolgirtinê yên Tirk (TİT)’ li xwe danîne ve, gefa kuştinê lê hat xwarin. Ayhan Bilgen, herweha ji ber heman sedeman, gellek caran ji aliyê hêzên îslamî ve jî, bi rexneyên tund hatibû rexnekirin. Hatiye diyarkirin ku van hêzên tarî, ji Ayhan Bilgen xwestine ku dev ji serokatiya Komeleyê berde.

Rêvebiriya Giştî ya Komeleya Mezluman, li ser vê yekê daxuyaniyek belav kir û di daxuyaniya xwe de diyar dike ku ew peyamên ku bûne sedemê geflêxwarina Serokê Komeleyê Ayhan Bilgen, ne peyamên wî yên şexsî ne, peyamên fermî yên Komeleyê ne.

“Em ji tevê malbata mirovatiyê û ji tevê çînên civatê re di eynî duriyê de ne”

Komeleya Mezluman, di daxuyaniya xwe de bîr û rayên xwe yên di vî derbarî de, weha eşkere dike; “Peyamên serokê me, di nav raya giştî de herçiqas wek bîr û rayên wî yên şexsî hatibin nirxandin jî, lê ev yek, ne rast e. Em dubare dikin ku ew peyam, ne peyamên wî yên şexsî ne.

Ew, bîr û rayên fermî yên Komeleya me ne. Komeleya me, ji destpêka damezrandina xwe û heta niha tu car ferqî nexistiye navbera gelan û mirovan û wek prensîb jî, komeleya me, ji tevê malbata mirovatiyê û herweha ji tevê çînên civatê re di eynî duriyê de ye. Heta niha tu car di van prensîbên me de tu guhertinek çê nebûye û çê nebe jî.

“Em li dijî her neyasayî û tundiyê radiwestin”

Em carek din dibêjin; ji ber çi sedemî dibe bila bibe, ji aliyê kî/ê ve dibe bila bibe, li dijî kî/ê dibe bila bibe, ger bêhuqûqî û tundî, bê bikaranîn, em li dijî vê yekê radiwestin û vê yekê napejrînin. Em li ser wê baweriyê ne ku nirxandina pirsgirêka Gelê Kurd û hêzên çendar ya di heman katagoriyê de, nirxandineke rast nîne û ev yek, pirsgirêkên vî welatî çaresr nake.”

Komeleya Mezluman, di dawiya daxuyaniya xwe de diyar dike ku ji niha û pêve jî, wê li dijî her bêhuqûqî û binpêkirina mafên mirovan rawestin û helwestên wan yên bi vî rengî, wê dom bikin.(pukmedia)