Ji KNK'ê bo pêşvebirin û parastina kurdî biryarên nû, 12 Tîrmeh,2006

Komîsyona Ziman û Perwerdehiyê ya KNK'ê bi armanca pêşîlêgirtina asîmîlasyon û otoasîmîlosyonê, biryarên nû girtin û bang li kurdan kir ku xwedî li zimanê xwe derkevin. Di civîna komîsyonê de hate destnîşankirin ku kurdî di jiyana kurdan de di astek pir kêm de tê bikaranîn û ev yek jî talûkeya ji holêrabûna kurdî bi xwe re tîne. Her wiha di civînê de '14'yê gulanê' wekî roja 'Cejna Zimanê Kurdî' hate qebûlkirin.

Komîsyona Ziman û Perwerdehiyê ya Kongreya Neteweyî ya Kurdistanê (KNK) bi rojevên ji aliye teorîk û pratîk ve pirsgirêkên kurdî û perwerdeya bi kurdî, astengiyên li pêşiya ziman û riyên çareseriya pirsgirêkan li hev civiya. Di civînê de hate destnîşankirin ku kurdî li Tirkiyeyê û li hemû deverên dîasporayê di warê pratîkê de, di asteya talûkeyê de kêm tê axaftin û di warên têkilî, danûstandin, nivîskarî û weşangerîyê de jî kêm tê bikarînan. Di civînê de hate tespîtkirin ku ligel vê qusûr û kêmasîya neaxaftina ziman, nebûna perwerdeya kurdî jî vê kêmasîyê kûrtir û girantir dike. Komîsyonê li ser vê bingehê biryarên nû girtin û pêşniyarên pratik ji bo hemû sazî û dezgehên kurdan kir. Di encama civînê de komîsyonê bi sernavê 'Hewara KNK'ê' bangaweziyek jî kir û wiha got:

'Talûkeya herî mezin bêberpirsayarî û xwepişaftin e'
"Komisyona ziman û perwerdeyê, ligel hazirîyên xwe yên teorîk û pratîk, hemû kar û xebatên organîzasyonên polîtîk, sosyal, kulturî û hunerî yên ku endamên KNK'ê ne, dane ber çav û li goreyî şert û hewcehiyên îro gihişte wê bawerîyê ku zimanê kurdî li bakurê Kurdistanê û li qadên dîasporayê di nava talûkeyê de ye. Talûke ji du aliyan ve heye. Yek êrîşkariya dewleta Tirkiyeyê û asîmîlasyon. Xemsariya kurdan bi xwe û otoasîmîlasyon (xwepişaftin). Ji bo balkêşana ser vê pirsê û rê li ber girtina prosesa asîmîlasyona dewleta Tirkiyeyê û xemsarî û bêberpirsiyariya kurdan bi xwe, dê çalakiyên ji bo dema navîn û demê dûr bên kirin."

'14'ê Gulanê Roja Cejna Zimanê Kurdî' hate qebûlkirin
Her wiha di civînê de ji bo balkişandina ser ziman '14'ê gulê' wekî Roja Cejna Zimanê Kurdî hate qebûlkirin û hate xwestin ji sala 2007'an paşve ji hêla hemû kurdan ve bi awayekî neteweyî bê pîrozkirin. Di civînê de ji bo fermîkirina zimanê kurdî jî biryara bi slogana 'Ziman Stûna ragirtina neteweyî ye' 'Kampanyaya zimanê kurdî' bê destpêkirin. Di civînê de hate daxuyandin ku kampanya berî serdema perwerdeyê û vebûna dibistanan, di 8'ê rezbera 2006'an de bi ragihandineke çapemenîyê bê destpêkirin.

Di encama nîqaş û nirxandinên civînê de ev biryar hatin girtin,

*Bi armanca kurdî di nava sîstema perwerdehiyê de bê fermîkirin dê çalakî bên li darxistin û li dijî polîtîkaya asîmîlasyonê ya dewleta tirk, bi çalakiyên demokratîk nerazîbûn bê nîşandayîn.

*Li ser pirsgirêkên ziman, bi taybetî li ser gramerê, dê di nava salekê de konferansekê bê çêkirin.

*Di nava 6 mehan de di çarçoveya Yekîtiya Eweropayê - pêvajoya endamtiya Tirkiyeyê- de, li ser rewşa zimanê kurdî û perwerdeya bi zimanê kurdî dê sempozyûmeke polîtîk, akademîk bê lidarxistin û rewş ji bo her du aliyan jî bi zelalî bê ragihandin.

*Komîsyon dê li ser rewşa ziman û perwerdeyê li herêmên kurdan û li dîasporayê raporekê amade bike.

*Ji bo medyaya kurdan cih bide xebatên têkildarî ziman û di vî warî de tevlêkirina dikeve ser milê xwe bike, dê xebat bêne kirin.

*Ligel nûnêrên dem û dezgehên neteweyî, di 12'ê gelawêja 2006'an de, li bajarê Almanya, Kolnê, dê civînek berfireh bê kirin û li ser ziman û perwerdeya kurdî rewşa derfetên xebata hevreyî bê nîqaşkirin.

*Dê bultena zimanê kurdî bê weşandin.
*Arşîva dokument û materyalên li ser zimanê kurdî û perwerdeya bi zimanê kurdî dê bê girtin.

Her wiha Komîsyona Ziman û Perwerdehiyê ya KNK'ê bi armanca balkişandina li ser girîngiyên ziman û astengkirina asîmîlosyon û otoasîmîlasyona li ser ziman, bi navê 'Hewara KNK'ê bangawaziyek kir û xwest ku hemû kurd bi zimanê xwe yê zikmakî biaxivin û xwedî li zimanê xwe derkevin.(dîha)