Biryara pêwîsker ya doza Şemzînanê hat eşkerekirin,20 Tîrmeh,2006 | Kurdistan

Dadgeha Cezayê Giran ya bajarê Wanê ku li Daweya bûyerên Şemzînanê dinhêrt, biryara xwe ya biûşt (gerekçeli)ya derbarê sûçdarên bûyerên Şemzînanê de eşkere kir. Di vê biryarê de hatiye diyarkirin ku çûndina berbazên leşkerî Ali Kaya û Ozcan İldeniz ya Şemzînanê, ne ji bo berhevkirina agahiyên îstîxbaratî
bûye. Ji bo bombekirin, kuştin û birîndarkirina mirovan bûye.

Nevzat Karakeçî-Wan

“Çûndina wan ne ji bo îstîxbaratê, ji bo bombekirin û kuştina mirovan bûye”

Li gor ku ji aliyê medyaya Tirk ve hatiye belavkirin, Dadgeha Cezayê Giran ya bajarê Wanê, di biryara xwe ya biûşt de, ya di derbarê sûçdarên bûyerên Şemzînanê berbaz Alî Kaya û Ozcan İldeniz û îtirafkarê PKKê Veysel Ateş de temam kir û ji raya giştî re eşkere kir.

Dadgeha Cezayê Giran ya bajarê Wanê, di biryara xwe ya biûşt de diyar dike ku van her sê mirovan, di çerçevoya rêxistineke çeteyî ya bidizî de lihev kirine û bihevdûre sûcên wek êrişên bombekirinê, kuştin û birîndarkirina mirovan, kirine. Herweha, di biryarê de hatiye ragihandin ku yên van bûyeran bi van berbazan dane kirin, fermandarên wan in. Lewra, ne mimkune ku ew bi serê xwe, van bûyeran bi kar bînin. Herweha, hatiye diyarkirin ku çûndina berbazên leşkerî Ali Kaya û Ozcan İldeniz ya Şemzînanê, ne ji bo berhevkirina agahiyên îstîxbaratî bûye. Ji bo bombekirin, kuştin û birîndarkirina mirovan bûye.

Wek tê zanîn, di 9ê Çiriya paşîn de li Şemzînanê, bi bombekirina pirtûkxaneyek bûyeran rudabûn û di
encama van bûyeran de, berbazên leşkerî Alî Kaya û Ozcan İldeniz û îtirafkarê PKKê Veysel Ateş, ji aliyê
xelqê Şemzînanê ve li ser sûc hatibûn girtin û –ku di erebeya wan de gellek çek, bombe, krokî belge û
belgename jî hatibûn dîtin- teslîmê hêzên dewletê hatibûn kirin. Piştî wan bûyeran, pêvajoya dadgehkirinê
dest pê kir û van sûcdaran, bi 39 sal û nîv î hatin cezakirin.

“Ev rêxistina çeteyî bi destên fermandaran hatiye damezrandin”

Dadgeha Cezayê Giran ya bajarê Wanê, di biryara xwe ya biûşt de, herweha radighîne ku hatiye tespîkirin ku
van kesên êrişker, girêdayiyê rêxistineke çeteyî ya bidizî ne. Lê ev rêxistin, bi destên van berbazan nehatiye
damezrandin. Lewra, delîl û belgeyên bidestxistî didin nîşandan ku ev rêxistin, bi destên hi kesên din ango
fermandarên van berbazan hatiye damezrandin. Lê van berbazan, van bûyeran jî, di çerçevoya vê rêxistinê de
û bi emrê fermandarên xwe, bi kar anî ne. Dadgeh, herweha ji rayedarên dewletê daxwaz dike ku li ser vê
rêxistinê, dest bi lêkolîn û lêpirsîneke berfireh bê kirin û kesên pişt perdê ango yên veşartî bên dîtin û
eşkerekirin.(pukmedia)