Hevbendiya Demokratîka Kurdên Bakur derbarê kêşeya Kurd, li YE hevdîtinên girîng pêkanîn,17 Pûşper,2006 | Kurdistan

Hevbendiya Demokratika Kurdên Bakur li roja çarşembê (14.6.2006), birek hevdîtinên bilind li avahiya meclisa Yekitiya Ewropa li Strasbourgê digel rayedarên payebilind yên Parlementa Ewropa pêkanîn. Di van hevdîtinan de, danustandin li ser çareser kirina pirsa gelê Kurd li Bakurê Kurdistanê û li ser çarçeva muzakereyan bi Tirkiye re, hatin kirin. Terefê kurd dîtin û pêşniyariyên xwe ji bo çareser kirina pirsa gelê Kurd li Bakûrê Kurdistanê û jibo endamtiya Tirkiye, rayedarên Parlemeta Ewropa re pêşkeş kirin û giftogu li ser kirin.

Heyet ji Dr. Musa KAVAL, Nunerê Hevbendiya Demokrata Kurdên Bakur, Bayram AYAZ nunerê PDK-B –(Partiya Demuqrata Kurdên Bakur ) û Suleyman ATAY Nunerê PSK (Partiya Sosyalista Kurdistan) pêktêt.

Ji ber ku Serokê Parlementa Ewropa Birêz Josep BORRELL FONTELLES celseyên civata gişti ya parlemeta Ewropa bi rêve dibe, di cihê xwe bi wekalet Joost LAGENDIK ji bo van hevdîtinan bi heyeta Hevbendiyê re destnîşan kir.LAGGENDIJK herwesan bi sîfetê xwe wek Serokê Komisyona hevbeş Tirkiye–Yekîtiya ewropa jî li Heyeta Hevbendiyê pêşwazîkir û pêre li ser pirsa Kurd giftogu kirin.

Di heman rojê de, Heyeta Hevbendiyê ji layê Gruba Muhafezekarên Ewropa (PPE) ve hate pêşwazî kirin. Li ser navê grobê João des Deus PINHEIRO cigirê Serokê wê, û Arthur HILDEBRAND berpirsiyarê navnetewî yê heman grubê, bi hevbendiyê re rûniştin. PPE ji partiyên muhafezekarên 25 Dewletên endamên Yekitiya Ewropa pêktê û ew gruba yekemîn e dı Parlamentoya Ewropi da.

Herwesan gruba Partiyên Sosyalistên Ewropa (PSE) jî, Heyeta Hevbendiyê pêşwazî kir û li ser navê wê Jan Marinus WIERSMA û Xatun Pasqualina NAPOLETANO, herwesan berpirsiyarê dosya Tirkiye Bruno MARASA û Rob van de Water Nunere tekiliyen Navnetewi tevlî civînê bûn. Gruba PSE jî, ji Partiyên Sosyalistên 25 Dewletên Yekitiya Ewropa pêktê û gruba duyemîn e.

Heyeta hevbendiyê di van hevdîtinan de, pêşniyarên giring ji bo çareseriya pirsa siyasî ya gelê Kurd li Bakûrê Kurdistanê, pêşkêşî serokê Parlemeta Ewropa kir. Heyet herwesan ev pêşniyaran jibo serokê PPE, Hans-Gert POETTERING û jibo Martin SHCULZ serokê PSE pêşkêş kirin.

Heyeta Hevbendiyê çareserkirina pirsa gelê Kurd û pêvajoya muzakereyan bi Tirkiye re bi awayek berfireh bi rayedarên YE re niqaşkirin, pêşniyar û daxwazên terefê Kurd anîn ziman. Daxwazên heyeta Hevbendiyê di van hevdîtinan di van xalên jêrîn de têne kin kirin :

- Pêwist e ku pirsa gelê Kurd li Bakurê Kurdistanê di demek nêzuk de bête çareser kirin, ji bo vê yekê ji YE, ji Parlemetê Ewropa û ji partiyên sereke li Ewropa tê xwestin ku inisiyativek bi cisaret wergirin û gelê Kurd bi awayek resmî wek gelê duyemîn li Tirkiye nas bikin.

- Bila muzakere bi Tirkiye re li ser vê binaxê bêne destpêkirin û domandin heya ku Tirkiye jî vê rastiyê qebulbike. Helwestek bi vî awayî rê li ber çareseriyê vedike û dê bibe sedemê xurt kirin û serkeftinê jibo tagirên careseriyê, jibo demokratparêz û reformxwazan li hundurê Tirkiye.

- Berdewam kirina siyaseta înkara gelê Kurd li Tirkiye tehlîkeyek mezin peyda dike ji bo gelê Kurd û ew dibe sedemê asimile kirına wî. Herwesan dibe sedemê berdewam kirina gengeşan û bê istiqrariyê li Tirkiye. Pêwist e ku Tirkiye dest ji vê siyasetê berde û mafên siyasî çandî, aborî û îdarî yên gelê Kurd nasbike û bêxe di warê jiyanê de.

- Bila YE ji Tirkiye bixwaze ku zimanê Kurdî jî, jibo Kurdan bibe zimanê perwerdeyê mecbûrî di hemu qonaxên xwendina resmî de.

- Sistemê dewleta merkezî li Tirkiye ne gora rastiyên tarîxî, çandî û dîroki ye. Ev sîstem pir çandiyê û pirrengiyê înkar dike û bûye sedemê berdewam bûna girifdariyên siyasî û aborî. Komara Tirkiye ji damezirandina xwe ve ta îro ne kariye bi vî sistemê çu pirsgirekên xwe yê sereke çareser bike. Ji ber vê yekê bila YE pistgiriya daxwaza hevbendiyê bo damezirandina sistemek federal bike.

- Pêwist e ku ji niho paşve leşkerên Tirk bandora xwe li ser siyasetê rakin.

- Pêwist e ku azadiyên giştî yên hevbeş û yên ferdî neyêne teng kirin û dewlet dest ideolojiya netewperest berde.

Heyeta Hevbendiya Demokratika Kurdên Bakûr, ji xeynî van babetan, ji ser pir babetên din jî bi YE re giftugo kirin û jê xwast ku ew di muzakereyan bi Tirkiye re cih bigrin û li ser wan tawîz neyête dayin.

Hevbendiya Demokratika Kurdên Bakûr