Kurdistan

Serketina Hezkirina Kurdan;Mehmed Uzun Ji Nexweşxaneyê Derket

17 Kewçêr,2006 weşandin:09:50:01 (GDK)

Nivîskar Mehmet Uzun ku 3 meh e li Amedê, ji ber qansêrê li nexweşxanê dihate dermankirin îro ji nexweşxanê derket.

Ûzûn, ji bo kesên wî tenê nehiştine û piştgirî danê, bi civîneke çapemeniyê, sipasî wan kir. Nivîskarê kurd Mihemed Ûzûn ku li Sêwêdê bi qansêra mîdê ketibû û 95 roje li nexweşxaneya Venî Vîdî ya Amedê dihat dermankirin, îro ji nexweşxanê derket.

Ûzûn, dema ji Sêwêdê hat li ser sedyeyê ew birin li nexweşxanê razandin, lê îro jî tevî doktorên xwe bi meşê ji nexweşxanê derket. Nivîskar Mihemed Ûzûn, bi munasebeta derketina ji nexweşxanê civîneke çapemeniyê li dar xist û got, ''Ez bawerbûm ku axa bakurê Mezopotamya, axa Amedê ji min re bibe şîfa. Bi piştgirî û morala Gelê min da min, ez hatim van rojan.''

Ûzûn diyar kir ku ji niha û pêve ewê li Amedê bi cih bibe û ji bo her kesê destek dayê malavayî kir.

Piştî Ûzûn, nivîskar Şêxmûs dîken, serokê Odeya Tabîban Adem Avcıkıran û serbijîşkê nexweşxana taybet a Venî Vîdî jî axivîn û gotin, wê piştgiriya wan a ji bo Ûzûn dewam bike. Doç. Dr. Mehmet Dursun jî anî ziman ku Mihemed Ûzûn, êdî hemû pêdiviyên xwe, bi xwe bi cîh tîne.

Mihemed Ûzûn piştî axaftinan bersiv da pirsên rojnamevanan. Ûzûn li li ser bibîrxistina Xelata Wêjeyê ya Nobelê ku dane Orhan Pamûk got, ''li huzûra we ez Orhan Pamûk pîroz dikim''

Ûzûn li ser pirseke din diyar kir ku ewê romana xwe ya nîvco mayî temam bike û derbarê eleqe û hezkirina Gel de, ewê romaneke biçûk jî binivîsîne. Nivîskar Mihemed Ûzûn wekî din got, ''ezê li ser Melayê Battî û nivîskarên Kurd binivîsînim. Ez dixwazim romaneke biçûk li ser wêjeya kilasîk a Kurd, zimanê Kurdî û xwezaya wê binîvîsînim û diyarî Gelê xwe bikim.''

Uzun, eşkere kir ku dê romanek biçûk binvîse û bi vî awayî bibe bersiva vê piştgiriyê. Uzun, hestên xwe bi gotinên wekî "Nivîsên ku ez pê gelek hestyar bûm, hatin nivîsandin. Bi sedan, bi hezaran name hatin nivîsandin. Li hizûra we dixwazim dîsa ji gelê xwe re ragihînim. Min di tevahiya jiyana xwe de xwest ku berhemên di xizmeta wan de binvîsim. Ez qurbana wan im" anî ziman.(dîha)

 

Hemû mafên nûçe û nivîsên ku destnîşana HAWARDENGÛBAS hatiyê danîn ser navê Hawar Kurdistan Media Group ya HAWARDENGÛBAS e.Beyî destûr naye bikaranîn.

Binivsîne  |  Biçe Jor   

Hemû Naveroka Beşa Kurdistan

irêdan